Ko Maungapōhatu te maunga. Ko Tauranga te awa. Ko Pouāhinau te pā. Ko Ngai Tūranga te hapū. Ko Te Waimana te whārua. Ko Tūhoe te iwi.
“Tūhoe moumou kai,
Moumou taonga,
Moumou tangata i te pō”
Kia ora, ko Tyler Hiriwa Te Kiri tēnei.
Āe, nō Waimana te uri nei. Heoi, ko Kirikiriroa te wāhi i whakatipu ake au. I kuraina au ki Waikato-Tainui, ā, nā Waikato-Tainui rāua ko Tūhoe i whāngai, i tiaki anō hoki tēnei tangata. Nui ake tōku whānau, heoi ko taku tino taonga ki rō, ko tōku tamaiti, ā, ko Broncho Jet McKenzie tēnā. I hua te whakaaro me whai te tohu kaiako e au mai i tōku ake wheako ki taku pākeketanga. I tūtaki au i ngā mahi kāore he pai ki a au. Heoi, i whakapā manawa ētahi o ngā mahi whakareri tangata mō te mahi. Nā ka whakahua te whakaaro, me whai e au tētahi tohu hei whakapiki ora i te iwi Māori. Arā, ka tukuna tono e au ki te Whare Wānanga o Waikato ki te whai i te huarahi o ngā kaiako. Koinā taku ahunga ki tēnei ara e whai ana au i tēnei wā.